«استانا اقشامى»
ەل جۇرەگى – ەلوردا شەجىرەسى

كۇللى الەم قول سوقتى

0 65

ەلورداداعى «استانا ارەنا» سپورت كەشەنىندە حالقىمىزدى ءدۇيىم ەلگە تانىتىپ جۇرگەن دارىندى ءانشى ديماش قۇدايبەرگەننىڭ «ارناۋ» اتتى جەكە كونتسەرتى ءوتتى.

بۇدان ەكى جىل بۇرىن اتالعان سپورت سارايىندا ديماشتىڭ «باستاۋ» دەگەن ءان كەشى وتكەن بولاتىن. ەندىگى ونەر كەشىن جاس ءانشى «ارناۋ» دەپ اتاپتى. وسى ءبىر ۇيلەسىم تاپقان اتاۋلاردا تەرەڭ ماعىنا بار دەپ ويلايمىن.
كۇللى الەم كوز تىككەن كەرەمەت كەشكە تالانتتى جاستىڭ جەرلەس­تەرى عانا ەمەس، الەمنىڭ 64 ەلىنەن 10 مىڭعا جۋىق تىڭدارمان كەلدى. ونىڭ ىشىندە قازاق جەرىنەن شالعاي جاتقان اقش، ۇلىبريتانيا، برازيليا، مەكسيكا، كانادا، اۆستراليا، شۆەيتساريا، مالايزيا، سينگاپۋر، افريكا، ەگيپەت، يزرايل جانە ماروككو سەكىلدى مەملەكەتتەردىڭ تۇرعىندارى بار. ءبىر عانا پولشا ەلىنەن ات تەرلەتىپ 20-عا جۋىق ادام كەلگەن. بىلتىر مادەنيەت جانە سپورت مينيسترلىگى ديماشقا قازاق ەلى اتىنان «تۋريزم ەلشىسى» دەگەن مارتەبەلى اتاق بەردى. بۇل بەكەر ەمەس. شىنىندا دا، قازىر ديماش ارقىلى جالپاق الەم قازاقستاندى جاڭا ءبىر قىرىنان تانىدى. وسىندايدا كورنەكتى ءسوز زەرگەرى عابيت مۇسىرەپوۆتىڭ «قاي حالىقتىڭ بولسا دا مادەنيەتىن، كوركەم ءسوزىن جالىنداتىپ جىبەرۋگە ءجۇز تالانت كوپتىك ەتپەيدى، ون تالانت ازدىق ەتپەيدى» دەگەن عيبراتتى ءسوزى ويىمىزعا ورالدى.
كەش شىمىلدىعىن ءانشى «Gol­den Intro» سيقىرلى سازعا تولى انىمەن اشتى. ارتىنشا «اققۋىم» ءانىن ورىنداپ، تىڭدارمانداردىڭ جۇرەگىن ەلجىرەتتى. مادەني شارانىڭ باسىندا ديماش كونتسەرتكە كەلگەن قاۋىمعا ريزاشىلىعىن ءبىلدىردى.
– اركىمنىڭ ءوز باقىت ولشەمى بار. مەنىڭ باقىتىم – حالقىم مەن ساحنا. مەنىڭ اندەرىم سىزدەردىڭ جۇرەكتەرىڭىزگە جەتىپ جاتسا، ارمانىمنىڭ ورىندالعانى دەپ بىلەمىن. مەنى سىيلاپ، ونەرىمدى باعالاپ كەلگەندەرىڭىز ءۇشىن العىسىمدى ايتامىن، – دەدى ول.
ءانشى بىلتىر كوگىمىزدەن قۇيرىقتى جۇلدىزداي اعىپ وتكەن ساڭلاق سپورتشى، دوسى دەنيس تەنگە ءان ارناپ، كوپشىلىكتىڭ كوزىنە جاس الدىردى. ول مانەرلەپ سىرعاناۋ­دان سوچي وليمپياداسىنىڭ قولا جۇلدەگەرى ونەر كورسەتكەن SOS d’un terrien en détresse كومپوزيتسياسىن ورىنداپ، كونتسەرتكە قوناق رەتىندە قاتىسىپ وتىرعان دەنيستىڭ اتا-­اناسىنا العىسىن جەتكىزدى.
– وسىدان ءبىراز ۋاقىت بۇرىن دەنيس ەكەۋمىز ەلىمىزدە وتەتىن كەلەسى ءان كەشىمدە دۋەت ايتامىز دەپ جوسپارلاعان ەدىك. بىراق… اللانىڭ جازعانىنا امال جوق. دەنيس ناعىز تۋما تالانت بولدى. از عانا عۇمىرىندا ۇلكەن جەتىستىككە جەتىپ، قازاق مەملەكەتىنىڭ تۋىن بيىككە كوتەرىپ كەتتى. ءبىز ونى ەشقاشان ۇمىتپايمىز. ونىڭ ەسىمى ەل تاريحىندا قالادى، – دەدى ديماش.
جاس تالانت سىرتتا جۇرسە دە، ەل ومىرىندە بولىپ جاتقان جاڭالىقتارمەن جاقىن تانىس ەكەندىگىن دە جاسىرمادى.
– جۋىردا ارىستا بولعان وقيعا ماعان دا قاتتى باتتى. ءتىپتى وسىنداي قىسىلتاياڭ كەزدە كونتسەرت بەرۋ ىڭعايسىزداۋ كورىندى. سولاي ايتقاندار دا كەزدەستى. الايدا شەتەلدەن شاقىرىلىپ قويعان قوناقتار بار. سولاردى دا ەسكەردىك. سوندىقتان ارىسقا كومەك رەتىندە وسى كونتسەرتتەن تۇسكەن قاراجاتتىڭ ءبىر بولىگىن اۋدارامىن. بۇل سىزدەردىڭ دە كومەكتەرىڭىز بوپ سانالادى، – دەدى.
كەشكە رەسەيلىك كومپوزيتور يگور كرۋتوي قاتىسىپ، ديماش­تىڭ ونەردەگى جولىنا ساتتىلىك تىلەدى. سونداي-اق ديماش جەكە كون­تسەرتىندە كورەرمەننىڭ جۇرەگىنەن ورىن تاپقان تۋىندىلاردان بولەك، ىستىعى سۋىپ ۇلگەرمەگەن جاڭا البومىنان بەس ءان شىرقاپ، جۇرتشىلىقتىڭ قۇلاق قۇرىشىن قاندىردى. قازاقتىڭ قارا دومبىراسىن دا كۇمبىرلەتتى.
جەر جۇزىندەگى ءانشىنىڭ بار جان­كۇيەرلەرى كوز سالعان كونتسەرتتىڭ ويداعىداي وتۋىنە 500-دەن اسا كاسىبي مامان تارتىلىپ، 1000-عا جۋىق جارىق قۇرىلعىلارى قولدانىلعان. قازاقشا ايتقاندا، «ءتورت قۇبىلاسى تۇگەل» مۇنداي ونەر كەشىندە ديماش قۇدايبەرگەن حالقىمىزدى الەمگە تاعى ءبىر تانىتىپ، مويىنداتتى.

پىكىر جازۋ

پوچتاڭىز جاريالانبايدى