«Astana aqşamı»
El jüregi – elorda şejiresi

Köpbalalı analardıñ järdemaqısı artadı

1 36

QR Eñbek jäne halıqtı älewmettik qorğaw mïnïstri Birjan Nurımbetov QR Prezïdenti janındağı Ortalıq kommwnïkacïyalar qızmetinde ötken baspasöz mäslïhatında 2020 jıldıñ 1 qañtarınan bastap barlıq köpbalalı otbasına tabısına qaramastan järdemaqı tölenetinin mälim etti.

Mïnïstrdiñ aytwınşa, bïılğı toğız ayda 417 mıñ otbasına AÄK tağayındalğan. «Biz respwblïkalıq byudjetten jekelegen memlekettik järdemaqı engizwdi josparlap otırmız. Ol elimizdegi barlıq köpbalalı otbasılarğa tölenedi. Ortaşa eseppen bir balağa 10-11 mıñ teñgeden beriledi. Jalpı mölşeri 2018 jıldan toqtatılğan osınday järdemaqı mölşerinen 4-7 ese artıq» dedi mïnïstr Birjan Nurımbetov. Atap aytqanda, 4 balası bar otbasına – 42500 teñge, 5 balası barlarğa – 53125 teñge, 6 balası bar üyge – 63750 teñge, 7 balası bar otbasına 73370 teñge köleminde järdemaqı tölenetin boladı. Eger köpbalalı otbası tabıs mölşerine qaray turmısı tömen otbası sanatına jatsa, onda bul otbasığa AÄK-pen qosa balalarğa kepildi älewmettik paket tağayındaladı. Söytip köpbalalı turmısı tömen otbası memleket tarapınan üş älewmettik kömek paketine ïe boladı.
Sonımen birge mïnïstr AÄK alatın eñbekke qabiletti otbası müşeleri jumıs istewi tïis ekenin atap ötti. Eger usınılğan jumıstan nemese jumıspen qamtw şarasınan bas tartatın bolsa, onda tek oğan ğana emes, bükil otbasığa tölem toqtatıladı. Olardı jumısqa ornalas­tırw üşin nätïjeli jumıspen qamtwda, käsipkerlikti damıtwda «Eñbek» memlekettik bağdarlamasınıñ barlıq mehanïzmderi paydalanılatın boladı. «Mektepke deyingi jastağı balalar üşin balalar tağam, gïgïenalıq quraldar, bilim berw qızmetteri usınıladı. Mektep jasındağı balalar üşin ıstıq tamaq, mektep kïimderi, jol şığının tölew, medïcïnalıq qızmet körsetw qarastırılğan» dedi mïnïstr. Almatınıñ barlıq awdanında ükimettik emes uyımdar tarapınan qurılğan «Baqıttı otbası» ortalıqtarında anaları kwrstan ötip jatqanda balalardıñ qarawsız qalmawına jağday jasalğan. Kwrstan ötken analarğa käsibin jürgizwge qaytarımsız granttar berilmek. B.Nurımbetov QR Eñbek mïnïstrligi arqılı ärbir otbasınıñ älewmettik kartası jasalğanın, ol memlekettik organdardıñ aqparattıq jüyelerinen avtomattandırılğan derekter negizinde otbasılardıñ naqtı märtebesin anıqtawğa mümkindik beretinin atap ötti.

Jadıra ŞAMURATOVA

  1. Bazïk :

    Bul järdemaqı ülken balam neşe jasqa tolğanğa deyin tölenedi? Jäne soñğı törtinşi balam 2018 de twıldı, mağan tïedi me?

Pikir jazw

Poçtañız jarïyalanbaydı