«استانا اقشامى»
ەل جۇرەگى – ەلوردا شەجىرەسى

كەلگەن دە قازاق، كەتكەن دە قازاق

0 104

ستاتيستيكا دەپارتامەنتىنىڭ مالىمەتتەرىنە ۇڭىلسەك، 2018 جىلدىڭ قاڭتار-مامىر ايلارىندا ەلورداعا 35370 ادام كوشىپ كەلىپتى، كەرىسىنشە، كوشىپ كەتكەندەردىڭ سانى – 30981 ادام. «2018 جىلدىڭ قاڭتار-مامىر ايلارىندا 2017 جىلدىڭ قاڭتار-مامىرىمەن سالىستىرعاندا استاناعا قونىس اۋدارعانداردىڭ سانى 49,5 پايىزعا ازايعان، ال قالادان كوشكەندەردىڭ سانى 37,5 پايىزعا قىسقارعان.

نەگىزىنەن، قالاداعى كوشى-قوندىق الماسۋ وڭىرارالىق ميگراتسيا ەسەبىنەن بولىپ وتىر: قاڭتار-مامىر ايلارىندا 21322 ادام قونىس اۋدارسا، 16424 ادام باس قالادان كوشكەن» دەلىنگەن اكىمدىكتىڭ رەسمي سايتى تاراتقان حابارلامادا.
ستاتيستيكا دەپارتامەنتىنىڭ اقپاراتى بويىنشا، ەلوردانىڭ كوشى-قوندىق وسىمىندە اقمولا وبلىسىنان كەلگەندەردىڭ ۇلەسى – 19,4 پايىزدى، بۇرىنعى وڭتۇستىك قازاقستان وبلىسىنىڭ ۇلەسى – 14,2 پايىزدى، قاراعاندى – 9,8 پايىزدى، شىعىس قازاقستان – 8,9 پايىزدى، الماتى قالاسى – 8,2 پايىزدى، باسقا وبلىستار 39,5 پايىزدى قۇرايدى.
سونىمەن قاتار، استانانىڭ ازەربايجان، قىرعىزستان، وزبەكستان سەكىلدى تمد ەلدەرىمەن كوشى-قوندىق سالدوسى دا كوڭىل كونشىتەرلىك ەكەن. گرۋزيا، ۇلىبريتانيا، ءباا، اقش، ساۋد ارابياسى، يسپانيا، چەحيا، قىتاي، جاپونيا، ليتۆا، تۇركيا، كورەيا رەسپۋبليكاسى، مالايزيا جانە موڭعوليامەن دە حالىقتىڭ ميگراتسيالىق سالدوسى جاعىمدى قالىپتاسىپتى. قۇزىرلى مەكەمەنىڭ حابارلاۋىنشا، ۇلتى بويىنشا ميگرانتتار قۇرىلىمىندا كوشىپ كەلگەندەردىڭ جالپى سانىنا قاراي قازاقتار 89,4 پايىزدى قۇراعان. اتاپ ايتارلىعى، استانادان كوشىپ كەتكەندەردىڭ جالپى سانىنىڭ 86,6 پايىزى دا قازاقتاردان تۇرادى. سوندا ءتور قالاعا كەلگەن دە قازاق، كەتكەن دە قازاق بولىپ تۇرعانى عوي. قونىستانعاندار اراسىندا ورىستاردىڭ ۇلەسى – 5,5 پايىز، ۋكرايندار – 0,8 پايىز، وزبەكتەر – 0,6 پايىز، تاتارلار – 0,8 پايىز، نەمىستەر – 0,5 پايىز، باسقا ۇلتتار 2,4 پايىزدى كورسەتىپتى.

پىكىر جازۋ

پوچتاڭىز جاريالانبايدى