«Astana aqşamı»
El jüregi – elorda şejiresi

Ewrazïya jazwşıları – bas qalada

0 33

Ulttıq mwzeyde elorda äkimdigi men Qazaqstan Jazwşılar odağınıñ astanalıq fïlïalı jäne «Altın qazına» qoğamdıq birlestiginiñ uyımdastırwımen qala künine oray «Ewrazïya astanalarınıñ qalamgerleri» attı eki kündik halıqaralıq forwm ötti.

Bul aytwlı şarada otandıq qalamgerler men 20 elden kelgen aqın-jazwşılar körkem ädebïettiñ özekti mäselelerin talqıladı.
Forwmnıñ aşılwında «Nur-Sultan» qalasınıñ äkimi Altay Kölginov qatısıp, aqın-jazwşılarğa izgi lebizin bildirdi.
– Büginde bas qalamız älemdik ekonomïka, din, sayasat, mädenïet jäne ğılım ökilderi bas qosıp, mañızdı şeşimder qabıldaytın orınğa aynaldı. Bügingi is-şaranıñ ötwi – sonıñ ayğağı. Säwleti men däwleti kelisken elordamızdıñ rwhanï qalıptaswına zïyalı qawım ökilderi aytarlıqtay ülesin qoswda. Zañğar jazwşı Muhtar Äwezov «Ädebïet – ardıñ isi» degen eken. Ädebïet salasınıñ örkendewi, oqırmandar qızığıp oqïtın körkem eñbekterdiñ jazılwı – biz üşin asa qajet dünïe. Bügingi forwmda älemdik ädebïettiñ jay-küyi, tildik mäseleler men qalamgerlerge özek bolıp jürgen dünïeler oy-talqısına tüsedi dep senemin. Sondıqtan alıs jäne jaqın şetelden kelgen aqın-jazwşılarğa Qazaq eliniñ jüregi – Nur-Sultan qalasına qoş keldiñizder demekpin!» dedi elorda basşısı.
Sonday-aq jïında Prezïdent keñesşisi Marat Sqaqov, Mädenïet jäne sport mïnïstri Aqtotı Rayımqulova, Qazaqstannıñ halıq jazwşısı, Eñbek Eri Oljas Süleymenov, belgili jazwşı, Memlekettik sıylıqtıñ ïegeri Äkim Tarazï söz alıp, forwmğa qatıswşılarğa sättilik tiledi.
Jïın eki plenaralıq otırısqa bölinip, qalamgerler «älemdik ädebïet: stereotïpten arılw» jäne «megopolïster ömiri: prozadağı körinister» attı taqırıpta oy qozğadı. Qazaqstan Jazwşılar odağınıñ birinşi hatşısı Ulıqbek Esdäwlet qazaq aqındarınıñ antologïyasın ïspan tiline awdarğan Ïspanïya PEN-klwbınıñ bas hatşısı Hwsto Horhe Padronğa Halıqaralıq «Alaş» sıylığın tapsırdı.

Pikir jazw

Poçtañız jarïyalanbaydı