«استانا اقشامى»
ەل جۇرەگى – ەلوردا شەجىرەسى

ەمحاناداعى «ءومىر مەكتەبى»

0 72

اۋەلگى بايلىق – دەنساۋلىق. ادام باقىتىنىڭ وننان توعىزى دەنىنىڭ ساۋلىعىنا بايلانىستى. جاقىندا نۇر-سۇلتانداعى №5 قالالىق ەمحاناسىندا ەرەكشە جيىن ءوتتى. ەرەكشەلىگى سول سوزىلمالى اۋرۋىنا شيپا تابا الماي جۇرگەن جانداردىڭ باسىن قوسقان «ءومىر مەكتەبى» اتتى كلۋبتىڭ 10 جىلدىعى اتاپ ءوتىلدى.

دۇنيەجۇزىلىك دەنساۋلىق ساقتاۋ ۇيىمى قانت ديابەتىنە شالدىققانداردىڭ قاتارى جىل ساناپ ارتىپ بارا جاتقانىن ءجيى حابارلاپ تۇرادى. مىنە، ەمحانا باسشىلىعى وسى مالىمەتتى قاپەرىندە ۇستاپ، 2009 جىلى اشىلعان كلۋبتىڭ نەگىزگى قىزمەتىن وسى باعىتقا ارناپتى. ال قازىر قانت ديابەتىمەن عانا شەكتەلمەگەن. ونداعى اقحالاتتىلار ناۋقاستارمەن ۇنەمى بايلانىستا بولىپ، دەنساۋلىعىن نازاردا ۇستايدى.
– ەمحانامىزدا قازىر 75 مىڭ ادام تىركەۋلى تۇر. از ەمەس. ولار­دىڭ ارقايسىسىنا جەكەلەي ءارى ارنايى كومەك كورسەتۋگە ۋاقىتىمىز جەتە بەرمەيدى. سول سەبەپتى «ءومىر مەكتەبى» دەگەن كلۋبىمىز اشىلدى. ونىڭ ءرولى وتە ۇلكەن. ماسەلەن، قانت ديابەتىنە جاڭادان تاپ بولعان ادام كوپ نارسەنى تۇسىنبەي جاتادى. بۇرىن-سوڭدى دۋشار بولماعان سوڭ تاڭسىق جايت. قاراپايىم عانا ديەتانى قالاي ۇستاۋ كەرەك ەكەنىن، ءدارى-دارمەكتى قاي ۋاقىتتا ىشۋگە بولاتىنىنان حابارسىز، تولىق اقپاراتتاندىرىلماعان. ونىڭ ۇستىنە دارىگەردىڭ ايتقانى ءبىر بولەك، ال وزىنە ۇقساس جۇرتپەن كەڭەسىپ، ولارمەن سىرلاسسا، ونىڭ ورنى تىپتەن وزگەشە. مىنە، ءبىزدىڭ ۇيىمنىڭ ەرەكشەلىگى وسىندا جاتىر، – دەدى №5 ەمحانانىڭ باس دارىگەرى التىنشاش تابۋلدينا.
قازىر №5 ەمحانادا اۋرۋلاردى باسقارۋ باعدارلاماسى قارقىندى جۇزەگە اسىرىلىپ كەلەدى. بۇل باعدارلاما اياسىندا ارنايى شارتقا وتىرعان ناۋقاستار ءموبيلدى قوسىمشا ارقىلى باقىلاۋدا بولادى. ولاردىڭ قانت كورسەتكىشى، قان قىسىمى، قاجەت اناليزدەرى – دارىگەرلەردىڭ ۇدايى نازارىندا. بۇل دا – دارىگەر مەن ناۋقاستىڭ ۇنەمى بايلانىستا وتىرعانىنىڭ بەلگىسى.
ۇيىمنىڭ مەرەيلى كۇنىنە وراي ۇيىم­داس­تىرىلعان ءىس-شاراعا ءبىراز ادام جينالدى. ولاردىڭ دەنى – ۆولونتەرلەر، ياعني ءوزى كۇرەسىپ جۇرگەن سوزىلمالى اۋرۋ تۋرالى ءبارىن بىلەتىن جاندار. الداعى ۋاقىتتا «ءومىر مەكتەبى» كلۋبىنىڭ قىزمەتىن كەڭىرەك قانات جايۋى ءۇشىن ءتۇرلى جۇمىستار اتقارىلۋ جوسپاردا بار. قازىردىڭ وزىندە قالانىڭ ەكىنشى شەتىندەگى تۇرعىندار دا وسى ۇيىمعا جۇگىنگەندى ءجون كورەدى ەكەن.
– قانت ديابەتىمەن اۋىرىپ جۇرگەنىمە ءبىراز ۋاقىت بولدى. باستاپقىدا دياگنوزىم بەلگىلى بولعان سوڭ قاتتى قينالدىم. جازىلمايتىن دەرتتىڭ ءبىرى. ىشتەي كۇيزەلىسكە دە ءتۇسىپ كەتتىم. بۇل مەنىڭ اۋرۋىمدى قوزدىرىپ، جاعدايىمدى ناشارلاتىپ جىبەردى. كەيىنىرەك «ءومىر مەكتەبى» كلۋبىنا قوسىلىپ، ءوزىمدى باقىلاۋدا ۇستاۋ­دى ۇيرەندىم، – دەگەن ۆولونتەر روزا نۇرماديقىزى بۇل ۇجىمعا جاڭادان كەلگەندەرگە تاجىريبەسىمەن ءجيى ءبولىسىپ تۇراتىنىن جەتكىزدى.
راس، قانت ديابەتى ەمدەلۋى وتە قيىن اۋرۋدىڭ ءبىرى. ونى تۇراقتى ەم-دومنىڭ، كۇتىمنىڭ ارقاسىندا عانا بىرقالىپتا ۇستاپ تۇرۋعا بولادى. قاباعىن شىتىپ، جابىرقاۋ، بىرنارسەگە الاڭداۋ، سونداي-اق دارىگەر كورسەتكەن رەجىمدى ۋاقىتىلى ورىنداماۋ كەرى اسەرىن تيگىزەدى. ال ءوز كەزەگىندە ەمحانانىڭ ەندوكرينولوگ مامانى گۇلبايرا قاسىموۆا كلۋبتا ءتۇرلى سالا قىز­مەتكەرلەرى جۇمىس ىستەيتىنىن جەتكىزدى.
– ولاردىڭ اراسىندا پسيحولوگ، فيزيولوگيالىق ەمدەۋگە جاۋاپتى تۇلعالار بار. ءوز باسىم ايىنا ءبىر كۇن كلۋبقا كەلىپ، ناۋ­قاستارمەن ۋاقىتىمدى وتكىزەمىن. قاجەت سۇراقتارىنا جاۋاپ بەرىپ، تۇراقتى بايلانىس ورناتامىز، – دەدى ەندوكرينولوگ.
ءيا، اقحالاتتى ابزال جانداردىڭ بۇل باس­تاماسى كوڭىل قۋانتادى. دۇنيەجۇزىلىك دەنساۋلىق ساقتاۋ ۇيىمى بىلتىر جەر بەتىندە 500 ملن ادام ديابەتپەن اۋىراتىنىن حابارلاعان. سوندىقتان مۇنداي كىشىگىرىم ۇيىم كوڭىلى جابىرقاۋ جاندارعا ۇلكەن پايداسىن تيگىزەرى انىق. يگى باستاما قاناتىن كەڭگە جايسىن دەپ تىلەيمىز!

پىكىر جازۋ

پوچتاڭىز جاريالانبايدى