«Astana aqşamı»
El jüregi – elorda şejiresi

Elordanıñ energïyasın sezin

0 92

Elimizde alğaş ret smartfondar men planşetterge arnalğan strategïyalıq oyın payda boldı. Keşe joba jetekşileri jwrnalïsterdiñ basın qosıp, «Qala burıştarı» dep atalatın oyın erejesimen tanıs­tırdı. 

Astana qalasınıñ äkimdigi jäne «Astana EKSPO-2017» ulttıq kompa­nïya­sınıñ qoldawımen Qazaqstan Gete-Ïns­tïtwtınıñ bazasında jasalğan bul joba törtkül dünïe köz tigip otırğan EKSPO körmesiniñ qurmetine arnalıptı.
Jobanıñ maqsatı – Astana qalasın­dağı oqwşılar men stwdentterge «Bolaşaq energïyası» taqırıbınıñ özektiligin oyın türinde jetkizw. Oyın barısındağı tapsırmalar jastarğa qorşağan ortanı qorğawğa jäne oğan qurmetpen qarawğa ïtermeleydi. Oyınşılar oyın barısında sïqırlı özenge qaytadan ömir sıylawğa umtıladı. Osı maqsatta sïqırlı energïya bölşekterin izdewi tïis. Bul kez kelgen adamdı bir sätke bolsa da tabïğatpen ündestire aladı» deydi «Qala burıştarı» jobasınıñ jetekşisi Ïrïna Heç.
Oyın jelisi boyınşa Han täñiriniñ bawrayında turatın ata-äjelerine kezekti demalısqa barğan ağayındı Talğat pen Dïna esimdi eki bala bes türli nışan tañbalanğan bir tas tawıp aladı. Bul zattıñ mänin surağan nemerelerine atası men äjesi sïqırlı özen men onıñ qarawıldarı twralı hïkayanı bayandap beredi. Olardıñ aytwı boyınşa, Astana şaharınıñ ornında burındarı Ot, Sw, Jel, Jer jäne Waqıt pen Bolaşaq attı bes türli energïyadan turatın bir sïqırlı özen bolğan eken. Ol energïyalardıñ ärqaysısı belgili bir qarawıldar tobınıñ qamqorlığında bolatın. Birde belgisiz bir sebepten qarawıldar ğayıp boladı. Tepe-teñdi­ginen ayırılğan özen swı tartılıp, qurğap qalıptı. Özendi qayta qalpına keltirw üşin qarawıldardı tabw kerek eken. Osı äñgime qattı äser etken Talğat pen Dïna jolğa şığadı. Oyınşılar oyın barısında ekewine qarawıldardı tabwğa kömektesedi.
Osı jıldıñ qırküyek ayınıñ soñı­nan bastap iske qosılatın bul oyındı Google Play jäne iTunes qosımşasınan qazaq, nemis, ağılşın, jäne orıs tilderinde aqısız jüktep alwğa boladı.

Bürkit NURASIL

Pikir jazw

Poçtañız jarïyalanbaydı