«Astana aqşamı»
El jüregi – elorda şejiresi

Elordalıqtar qalay dawıs beredi?

0 49

Keşe Oqwşılar sarayında «Qazaqstan Respwblïkası Prezïdentiniñ 2019 jılğı 9 mawsımdağı kezekten tıs saylawın uyımdastırw jäne ötkizw» degen taqırıpta saylawdı uyımdastırwşılar men elordadağı dawıs berw procesine qatıswşılarğa arnalğan semïnar ötti. Semïnarğa awmaqtıq saylaw komïssïyalarınıñ müşeleri, wçaskelik saylaw komïssïyalarınıñ törağaları men hatşıları, sot, tötenşe jağday jönindegi basqarma ökilderi qatıstı. Saylawşılar tizimin qurw boyınşa atqarwşı organdardıñ jumısı jäne saylaw wçaskelerin materïaldıq-tehnïkalıq jağınan qamtamasız etw twralı Nur-Sultan qalası äkiminiñ orınbasarı Erlan Qanalïmov bayandama jasadı. Qalalıq saylaw komïssïyasınıñ keñesşisi Vera Pıt'eva wçaskelik saylaw komïssïyalarınıñ saylawğa dayındığı qızmetin uyımdastırw jäne ötkizw jöninde egjey-tegjeyli äñgimeledi.

Mügedekterdiñ quqıqtarına köñil bölinedi

Qala äkiminiñ orınbasarı Erlan Qanalïmov saylaw wçaskelerin materïaldıq-tehnïkalıq turğıdan qamtamasız etw twralı tolıqqandı aqparat berdi. Onıñ aytwınşa, elorda äkimdigi saylawğa jan-jaqtı dayındıq jürgizwde. Qala äkimi ärbir saylaw wçaskesine jawaptı memlekettik organdardı bekitken. Ärbir memlekettik organğa, äkimdiktiñ qurılımdıq mekemelerine jeke-jeke saylaw wçaskeleri bekitilgen. Olar sol wçaskelerge tolıq jawaptı. Saylawğa dayındıq jönindegi qalalıq ştab jumıs isteydi. Ştab qalalıq saylaw komïssïyasımen kelise otırıp, saylaw wçaskelerin bezendirwdiñ birıñğay tujırımdamasın bekitipti.
– Ärbir aşıq wçaskede dawıs berwge arnalğan 4 standart kabïna jäne mümkindigi şektewli azamattarğa arnalğan 1 kabïna ornatılğan. Jabıq saylaw wçaskeleri 2 standarttı kabïnamen jäne qajetine qaray mümkindigi şektewli azamattarğa arnalğan kabïnalarmen jabdıqtaladı. Sondıqtan jabıq saylaw wçaskelerindegi komïssïya törağalarınan mümkindigi şektewli azamattarğa arnalğan kabïnağa suranıs joldawlarıñızdı suraymın, – dep tüsindirdi Erlan Ermekulı.
Onıñ aytwınşa, wçaskelerdiñ talaptarğa säykestigine qatıstı jürgizilgen monïtorïng barısında 81 eski ülgidegi Memlekettik Eltañbanıñ barı, 49 Memlekettik Twdıñ jağdayı sın kötermeytini anıqtaldı. Bul mäseleni şeşwdi äkimdik öz moynına alğan. Aldağı künderi jetpeytin wçaskeler bo­yınşa Twlar men Eltañbalar awdan äkimdikterine beriledi. Olar öz kezeginde wçaskelerge taratatın boladı.
Wçaskelerdegi arnayı stendterde Prezïdenttikke ümitkerlerdiñ swretteri jäne aqparattıq materïaldar ilinedi. Keybir wçaskelerge qoyılatın üşinşi stendterge saylaw wçaskesindegi is-qïmıl erejeleri, halıqaralıq baqılawşılar men şeteldik BAQ ökilderine arnalğan mälimetter jazıladı. Är saylaw wçaskesinde telefon, ğalamtor jäne Halıqqa qızmet körsetw ortalığı (HQO) üşin mobïl'di baylanıs operatorlarınıñ jeke jelisi sïyaqtı baylanıs quraldarı ornatıladı.
Bul jolğı saylawdağı jañalıqtıñ biri – 204 saylaw wçaskesinde halıqqa mekenjaylıq anıqtamalar beretin mobïl'di halıqqa qızmet körsetw ortalıqtarı (HQO) aşıladı. Saylawşılardıñ belsendiligin arttırw maqsatında uyımdastırılatın mobïl'di HQO 2019 jıldıñ 1 mawsımında testilew tärtibinde iske qosıladı. Barlıq wçaskelerdi tolıq materïaldıq-tehnïkalıq jağınan jaraqtandırw jumıstarı 20 mamırğa deyin ayaqtaladı. Är wçaske Ortalıq saylaw komïssïyası bekitken talaptarğa säykes jabdıqtaladı.
Elimizdiñ saylaw zañnamasında mügedekterdiñ quqıqtarın qorğaw­ğa qatıstı jaña tüzetwler engizilgeni mälim. «Jumıs barısında 238 wçaskede 17 pandwstıñ joq ekendigin anıqtadıq. Bul kemşilikterdi joyu üşin arnayı mamandandırılğan kompanïyanı tarttıq. Bul jerde biz qayırımdılıq is emes, mügedekterdiñ qoğamnıñ tolıqqandı müşesi retindegi zañdı quqıqtarın qorğaw­dı qamtamasız etemiz. Mümkindigi şektewli adamdarğa arnalğan qolaylı ortanı qurwda elorda özge öñirlerge ülgi bolwı tïis» dep mälimdedi Erlan Qanalïmov.

Saylawşılardıñ tizimi naqtılandı

Bayandamaşı öz sözinde «QR saylaw twralı» zañnıñ bastı özgerisi – «Jeke tulğalar» memlekettik derekqorı negizinde saylawşılardıñ tizimin qalıptastırw mäselesine erekşe toqtaldı. Äkimdik wäkiletti memlekettik organdarmen birlese otırıp, «Jeke tulğalar» memlekettik derekqorı tizimindegi problemalıq saylawşılardı iriktew jumısın jürgizgen. Sonıñ işinde saylawşılar tizimin anıqtaw jäne naqtılaw jumıstarı birneşe bağıttarğa jürgizilgen. Osı şaralardıñ nätïjesinde elordada burın tirkelip, qazir tirkewden şıqqan 60240 adam tizimnen sızılğan. Onıñ işinde buzılğan üylerde tirkelgen 12 mıñ adam bar. Jeke tulğalar bazasınan alınğan problemalıq saylawşılardıñ mälimetteri birıñğay eseptew ortalığı, densawlıq saqtaw, bilim berw, salıq, säwlet, azamattarğa arnalğan Ükimet sïyaqtı balamalı qalalıq bazalar arqılı tekserilgen. Sonıñ nätïjesinde saylawşılar jönindegi teris mälimetter 150-den 43 mıñğa de­yin azayıptı.
Saylawşılardıñ tizimin naqtılawdağı tağı bir şara – jer üyler men päterlerdi aralaw. 15 säwir men 6 mamır aralığında awdan äkimdikteri barlığı 2741 köpqabattı turğın üydi, 269784 päterdi, 32872 jeke sektordağı üydi aralağan. Osı jumıstıñ nätïjesinde 241288 saylawşı tizimge qayta qosıldı. Sonday-aq, bas qaladağı 57 mıñ joğarı oqw ornı stwdenti saylawşılar tizimine qosılıptı.

El jüregi – astana dawıs beredi!

Qala turğındarına qolaylılıq twğızw üşin äkimdik alğaşqılardıñ biri bolıp saylawşılar tizimin izdew qızmetin iske qosıptı. Büginge deyin osı qızmet türi boyınşa 22316 saylawşı özi twralı mälimetti teksergen. «10 sanat boyınşa turğındardıñ älewmettik jağınan osal toptarınıñ tizimi tekserildi. Bul sanatta 146 mıñ adam bolsa, sonıñ işinde 20 mıñı – mügedekter, olardıñ bärine arnayı şaqırw jiberiledi» dedi Erlan Qanalïmov.
Onıñ aytwınşa, elordada bïıl 18 jasqa tolıp, alğaş ret dawıs beretin 34366 adam bar eken. «El jüregi – Nur-Sultan dawıs beredi!» attı şaranıñ şeñberinde olarğa arnayı logotïpi bar jeyde, qalpaq, saptıayaq jäne özge de sıylıqtar tabıstaladı. Saylaw­şılardıñ sayasï dodağa degen belsendiligin arttırw maqsatında ötkiziletin ïmïdjdik joba, negizinen, Facebook, Instagram älewmettik jelilerinde (Elorda Live attı arnayı taqırıptıq paraqşalar aşılğan) belsendi nasïhattaladı.
Halıqtıñ saylawğa degen qızığwşılığın arttırw maqsatında äkimdik birqatar is-şaralardı qolğa alıptı. Sonıñ biri – bas qaladağı 18 LED-ekranda körsetilip jatqan beynerolïkter. Munday beynerolïkter elordanıñ barlıq kïnoteatrlarında («Arman», «Kïnopark», «Ewrazïya», «Çaplïn» jäne t.b.) qoyılwda. Saylawdı nasïhattaytın plakattar ilingen 50 avtobws qala köşelerimen jüytkip jür. Ayaldama keşenderine 100 banner ilingen. «Han Şatır», «Sarıarqa», «Kerwen Sïtï» jäne «Mega Silk Way» sïyaqtı eñ iri sawda, oyın-sawıq ortalıqtarında awdïo jäne beynerolïkter körsetilwde. Sonday-aq, eriktilerdiñ qatıswımen promoakcïya bastalğanı mälim boldı.
Söz soñında Erlan Qanalïmov qaladağı ärbir saylaw wçaskesiniñ özgelerge ülgi bolwı tïistigin atap ayttı. «Elordanıñ märtebesi men onıñ el ömirindegi alatın ornına baylanıstı halıqaralıq baqılawşılar men şeteldik BAQ-tar eñ aldımen bas qalağa nazar awdaratını sözsiz. Sondıqtan bärimiz birigip, elimiz üşin asa mañızdı şaranı joğarı deñgeyde uyımdas­tırıp, ötkizwimiz qajet» dedi ol.

Pikir jazw

Poçtañız jarïyalanbaydı