«Astana aqşamı»
El jüregi – elorda şejiresi

Dïplom ïelenw degeniñe jetkizbeydi

Sebebi keleşekte mïllïard adam jumıssız qalwı mümkin

0 11

Qazir UBT-nıñ qızğan şağı. Talapkerler jantalasa bolaşaq mamandıqtarın tañdap, ömirlerindegi eñ mañızdı şeşimderiniñ birin jasamaqşı. Olardıñ oyında «Oqwımdı bitirip şıqqan soñ, qanday jumıs isteymin?» degen alañdawşılıqtıñ da bolatını belgili. Osı orayda biz olarğa säl bağıt bermek maqsatpen bolaşaqta suranısı artatın, sonday-aq qajettiligi de tömendeytin mamandıqtar twralı az-kem şolw jasağandı jön kördik.

Qazaq strategïyalıq zerttew ïns­tïtwtı mamandarı bolaşaqta joğalıp ketw qawpi bar mamandıqtar jaylı taldaw jasadı. Olardıñ payımınşa, aldağı jıldarı qağaz-baspa öndirisi, murağat, kitaphana, poşta baylanısına qatıstı mamandıqtar tügeldey derlik joyılmaqşı. Bul boljamdarın sarapşılar tehnologïya men ğalamtor jüyesiniñ damwımen tüsindiredi. Mäselen, qağaz kitaptardıñ ornın elektrondı kitaptar men sayttar almastırwda. Sonday-aq qazirgi tañda ay sayın nebäri 20 teñge töley otırıp on mıñdağan kitap qorı bar elektrondı kitaphana qızmetin paydalanw mümkindigi de qarastırılğan. Ğalamtordıñ damwı adamdardıñ murağat aqtarıp, aqparat izdewge degen qajettiligin de joydı. Al elektrondı hat almasw mümkindiginiñ arqasında büginde poşta qızmetine degen suranıs burınğıday joğarı emes.
Sonday-aq joğarıdağı «qawipti» tizimde bank salası qızmetkerleri de bar. Tölem termïnaldarınıñ köbeyui, kartoçkalıq esep ayırısw jüyesiniñ jaqsarwı, ïnternet-bankïngtiñ jetilwi bankte qızmet etetin birşama mamandıqtıñ mañızın tömendetwde.
Atalğan mäsele jayında basqalar ne deydi eken?! QR Eñbek jäne halıqtı älewmettik qorğaw vïce-­mïnïstri Narïman Muqışevtıñ pikirinşe, bolaşaqta joğalatın mamandıqtar qatarına mehanïkalıq eñbekti talap etetin qızmet türleri kiredi. «Kezindegi şottıñ ornı qazir komp'yuterlermen almastı, zaman jañarğan sayın adamnıñ qajettilikteri men sura­nıstarı da ösip otıradı. Son­dıqtan qızmetkerler qazirden bastap bolaşaqta qızmetin awıs­­tırwğa dayın bolwı tïis» deydi ol.
Al BTS Digital bilim damıtw ortalığınıñ basşısı Sayasat Nurbek «Key mamandıqtardıñ kädege jaramay qalwı sebepti, aldağı 15-20 jıl işinde älem boyınşa 1 mlrd-qa jwıq adam jumıssız qalwı mümkin. AQŞ-tıñ Massaçwsets tehnologïya ïnstïtwtı 1960 jıldan bastap qanday mamandıqtarğa suranıs tömendeytinin anıqtağan. Sonda eñ birinşi kezekte birkelki, kündelikti qaytalanatın jumıs türleri, yağnï kitaphanaşı, zañger, kassïr, satwşı mamandıqtarına suranıs joğalatını belgili bolğan. Öytkeni kündelikti qaytalanatın jumıstardı adamnan göri maşïna äldeqayda sapalıraq äri tezirek atqara aladı» degendi aytadı.

Ayımgül BAĞDAT,
Ewrazïya ulttıq
wnïversïtetiniñ stwdenti

Pikir jazw

Poçtañız jarïyalanbaydı