«استانا اقشامى»
ەل جۇرەگى – ەلوردا شەجىرەسى

ديپلوم يەلەنۋ دەگەنىڭە جەتكىزبەيدى

سەبەبى كەلەشەكتە ميلليارد ادام جۇمىسسىز قالۋى مۇمكىن

0 11

قازىر ۇبت-نىڭ قىزعان شاعى. تالاپكەرلەر جانتالاسا بولاشاق ماماندىقتارىن تاڭداپ، ومىرلەرىندەگى ەڭ ماڭىزدى شەشىمدەرىنىڭ ءبىرىن جاساماقشى. ولاردىڭ ويىندا «وقۋىمدى ءبىتىرىپ شىققان سوڭ، قانداي جۇمىس ىستەيمىن؟» دەگەن الاڭداۋشىلىقتىڭ دا بولاتىنى بەلگىلى. وسى ورايدا ءبىز ولارعا ءسال باعىت بەرمەك ماقساتپەن بولاشاقتا سۇرانىسى ارتاتىن، سونداي-اق قاجەتتىلىگى دە تومەندەيتىن ماماندىقتار تۋرالى از-كەم شولۋ جاساعاندى ءجون كوردىك.

قازاق ستراتەگيالىق زەرتتەۋ ينس­تيتۋتى ماماندارى بولاشاقتا جوعالىپ كەتۋ قاۋپى بار ماماندىقتار جايلى تالداۋ جاسادى. ولاردىڭ پايىمىنشا، الداعى جىلدارى قاعاز-باسپا ءوندىرىسى، مۇراعات، كىتاپحانا، پوشتا بايلانىسىنا قاتىستى ماماندىقتار تۇگەلدەي دەرلىك جويىلماقشى. بۇل بولجامدارىن ساراپشىلار تەحنولوگيا مەن عالامتور جۇيەسىنىڭ دامۋىمەن تۇسىندىرەدى. ماسەلەن، قاعاز كىتاپتاردىڭ ورنىن ەلەكتروندى كىتاپتار مەن سايتتار الماستىرۋدا. سونداي-اق قازىرگى تاڭدا اي سايىن نەبارى 20 تەڭگە تولەي وتىرىپ ون مىڭداعان كىتاپ قورى بار ەلەكتروندى كىتاپحانا قىزمەتىن پايدالانۋ مۇمكىندىگى دە قاراستىرىلعان. عالامتوردىڭ دامۋى ادامداردىڭ مۇراعات اقتارىپ، اقپارات ىزدەۋگە دەگەن قاجەتتىلىگىن دە جويدى. ال ەلەكتروندى حات الماسۋ مۇمكىندىگىنىڭ ارقاسىندا بۇگىندە پوشتا قىزمەتىنە دەگەن سۇرانىس بۇرىنعىداي جوعارى ەمەس.
سونداي-اق جوعارىداعى «قاۋىپتى» تىزىمدە بانك سالاسى قىزمەتكەرلەرى دە بار. تولەم تەرمينالدارىنىڭ كوبەيۋى، كارتوچكالىق ەسەپ ايىرىسۋ جۇيەسىنىڭ جاقسارۋى، ينتەرنەت-بانكينگتىڭ جەتىلۋى بانكتە قىزمەت ەتەتىن ءبىرشاما ماماندىقتىڭ ماڭىزىن تومەندەتۋدە.
اتالعان ماسەلە جايىندا باسقالار نە دەيدى ەكەن؟! قر ەڭبەك جانە حالىقتى الەۋمەتتىك قورعاۋ ۆيتسە-­مينيسترى ناريمان مۇقىشەۆتىڭ پىكىرىنشە، بولاشاقتا جوعالاتىن ماماندىقتار قاتارىنا مەحانيكالىق ەڭبەكتى تالاپ ەتەتىن قىزمەت تۇرلەرى كىرەدى. «كەزىندەگى شوتتىڭ ورنى قازىر كومپيۋتەرلەرمەن الماستى، زامان جاڭارعان سايىن ادامنىڭ قاجەتتىلىكتەرى مەن سۇرا­نىستارى دا ءوسىپ وتىرادى. سون­دىقتان قىزمەتكەرلەر قازىردەن باستاپ بولاشاقتا قىزمەتىن اۋىس­­تىرۋعا دايىن بولۋى ءتيىس» دەيدى ول.
ال BTS Digital ءبىلىم دامىتۋ ورتالىعىنىڭ باسشىسى ساياسات نۇربەك «كەي ماماندىقتاردىڭ كادەگە جاراماي قالۋى سەبەپتى، الداعى 15-20 جىل ىشىندە الەم بويىنشا 1 ملرد-قا جۋىق ادام جۇمىسسىز قالۋى مۇمكىن. اقش-تىڭ ماسساچۋسەتس تەحنولوگيا ينستيتۋتى 1960 جىلدان باستاپ قانداي ماماندىقتارعا سۇرانىس تومەندەيتىنىن انىقتاعان. سوندا ەڭ ءبىرىنشى كەزەكتە بىركەلكى، كۇندەلىكتى قايتالاناتىن جۇمىس تۇرلەرى، ياعني كىتاپحاناشى، زاڭگەر، كاسسير، ساتۋشى ماماندىقتارىنا سۇرانىس جوعالاتىنى بەلگىلى بولعان. ويتكەنى كۇندەلىكتى قايتالاناتىن جۇمىستاردى ادامنان گورى ماشينا الدەقايدا ساپالىراق ءارى تەزىرەك اتقارا الادى» دەگەندى ايتادى.

ايىمگۇل باعدات،
ەۋرازيا ۇلتتىق
ۋنيۆەرسيتەتىنىڭ ستۋدەنتى

پىكىر جازۋ

پوچتاڭىز جاريالانبايدى