«Astana aqşamı»
El jüregi – elorda şejiresi

Dinï birlestik ökilderi Astana toyımen quttıqtadı

0 88

Astana qalasınıñ 20 jıldığın merekelew qarsañında Din isteri komïtetiniñ törağası Erkin Oñğarbaevtıñ törağalığımen dinï birlestikter ökilderi «Astanabeybitşilik pen kelisimniñ rwhanï ortalığı» taqırıbında kezdesw ötkizdi. İs-şarağa elimizdegi dinï birlestikterdiñ jetekşileri, Ulttıq murağat pen Mädenïetter men dinderdiñ halıqaralıq ortalığınıñ ökilderi qatıstı.

«Bïıl Astananıñ elorda märtebesin alğanına 20 jıl tolıp otır. Bul mereke älewmettik-sayasï mañızğa ïe jäne şın mäninde Qazaqstan halqı üşin jalpıhalıqtıq bolıp tabıladı. Astana – memleketimizdiñ ulttıq zamanwï brendine aynaldı» dey kele komïtet törağası elordanıñ jetistikterin  bayandadı.

Al «Nur Astana» ortalıq meşitiniñ bas ïmamı Asqar Muqanov öz sözinde «Qazaqstandağı beybitşilik pen kelisimdi qamtamasız etw täjirïbesi, sonday-aq bizdiñ elimizdiñ jäne onıñ Prezïdentiniñ halıqaralıq bedeli Astanada mädenïetter men älemdik dinder dïalogın uyımdastırwğa mümkindik berdi. Astana – beybitşilik pen kelisimniñ toğısqan jeri jäne beybit kelissözder men älemdik dinder dïalogı alañı» ekenin ayttı.

Dinï birlestik ökilderi de elorda twralı jılı lebiz bildirwdi umıtpadı. Astana kïeli okrwginiñ ökili Dmïtrïy Baydek Qazaqstan halqın quttıqtay otırıp, bïıl küzde Älemdik jäne dästürli dinder jetekşileri Astananıñ rwhanï sammïtinde altınşı ret kezdesetinin mälimdedi.  Kezdesw qorıtındısı boyınşa dinï birlestik ökilderi Qazaqstan halqın Astana künimen quttıqtap, ıstıq ıqılastarın bildirdi.

«Bizdiñ bärimizdi ortaq üyimiz – Qazaqstanğa degen ortaq süyispenşilik, memleketimizdiñ, jäne onıñ azamattarınıñ bügini men kemel keleşegine degen senim biriktiredi. Astana qalasınıñ 20 jıldığın merekelew qarsañında, biz – Qazaqstan Respwblïkasınıñ dinï birlestikteriniñ ökilderi, köpulttı jäne köpkonfessïyalı memleketimizdiñ halqına el-jurtımız aman, denimiz saw, baqıtımız bayandı bolsın degen izgi tilekterimizdi ıqılaspen joldaymız!» delingen quttıqtawda.

Pikir jazw

Poçtañız jarïyalanbaydı