«Astana aqşamı»
El jüregi – elorda şejiresi

Boz kilemde – älem balwandarı

0 26

Elordada ötip jatqan grek-rïm, erkin jäne äyelder küresinen älem çempïonatına 105 memleketten mıñnan astam balwan jïnaldı. Ötken senbi küni jalawı köterilgen älemdik dodanı Prem'er-mïnïstrdiñ orınbasarı Berdibek Saparbaev pen Nur-Sultan qalasınıñ äkimi Altay Kölginov aştı.Qazaqstan astanasında osı çempïonattıñ bekerden-beker uyımdastırılmağanın, küres dese delebesi qozbaytın qazaqtıñ joqtığın aytqan B.Saparbaev soñğı bes jılda Elbası bastamasımen elimizde 5 mıñğa tarta sport nısanı salınğanın atap ötti. A.Kölginov öz kezeginde Nur-Sultan qalasına osınday iri jarıstı ötkizw märtebe ekenin, bul el jäne şahar tarïhında aytwlı oqïğa retinde qalatının ayttı.
Älem çempïonatın uyımdastırw komïtetiniñ törağası Erlan Qojasbaydıñ aytwınşa, janküyerler jarısqa ülken qızığwşılıq tanıtıp, onlayn türde 25 mıñ bïlet satıldı. Çempïonattıñ bir erekşeligi, munda kelesi jılı Japonïya astanası Tokïoda ötetin jazğı Olïmpïadağa joldamalar sarapqa salınadı.
Çempïonatta kürestiñ 3 türinen 10 salmaq därejesi boyınşa jeñimpazdar anıqtaladı. 22 qırküyekke deyin jalğasatın dodanıñ alğaşqı künderi birneşe salmaqtağı çempïondar belgili boldı. Atap aytqanda, 55 keli salmaq därejesinde Nwgzarï Cwrcwmïya (Grwzïya) fïnalda otandasımız Qorlan Jaqanşanı jığıp, jeñis tuğırına köterildi. Qorlan kümis medal' ïegeri atandı. 63 kelide Şïnobw Otağa (Japonïya) eşkim teñ kelmedi. Bul salmaqta Qazaqstan quramasınıñ kapïtanı Almat Kebispaev qola medal'di qanağat tuttı. 72 kelide Abwyazïd Mancïgov (Resey), 82 kelide Laşa Gobadze (Grwzïya) çempïon boldı.
Erekşe atap öterligi, bul çempïonatta sırt el quramalarınıñ quramında Qazaqstanda twğan balwandar da boz kilemge şıqtı. 60 keli salmaq därejesinde Taraz qalasınıñ twması Marat Garïpov Brazïlïya atınan beldesip, qandasımız Meyrambek Aynağulovqa ese jiberip aldı. Al Özbekstan quramasındağı qandasımız Elmurat Tasmuratov japonïyalıq Kenïçïro Fwmïtodan jeñilip qaldı.

Pikir jazw

Poçtañız jarïyalanbaydı