«Astana aqşamı»
El jüregi – elorda şejiresi

Bïznes şıñına şığw

TMD-dağı tuñğış startap-ïnkwbator Astanada aşıladı

0 96

Astanada osı jıldıñ 1 jeltoqsanınan bastap «Seedstars» halıqaralıq tehnologïyalıq startap-ïnkwbatorı aşıladı. Onıñ ortalığı «Hilton Astana» qonaqüyinde ornalasqan.

Memleket basşısınıñ «Rwhanï jañğırw» bağdarlamalıq maqalası men «Astana – ïnnovacïyalar qalası» strategïyası qağïdaların jüzege asırw maqsatında qalalıq Ïnvestïcïyalar jäne käsipkerlikti damıtw basqarması men halıq­aralıq bïznes ïnkwbatorları «Seedstars» jäne «BI Property» JŞS arasında äriptestik twralı memorandwmğa qol qoyıldı.
Kelisim boyınşa kompanïyalar salğan ïnvestïcïyanıñ arqasında elordada adam kapïtalın damıtw üşin biregey alañ qurılmaq. Onda qalanıñ ärbir turğını jaña tehnologïya salasında täjirïbe alıp, jeke jobasın iske asırwına jağday jasaladı, buğan qosa jastardıñ älewetin damıtwğa basımdıq berilmek.
– Ülken megapolïsterdiñ täjirïbesine qarap-aq jahandıq qalalardıñ tepe-teñ damwı kreatïvi joq ïndwstrïyasız mümkin emestigin bayqawğa boladı. Sol sebepti biz kreatïvti klasterdiñ negizin qalıptastıratın qalalıq ïnnovacïyalıq alañ qurmaqpız. Munda elordanıñ ïnnovacïyalıq ekojüyesi qalıptasadı, – dedi Astana qalasınıñ äkimi Äset Ïsekeşev.
Joba seriktesteriniñ biri Devïd Dekombes ortalıqta älem boyınşa 70 mıñnan astam startaper, käsipker men ïnvestorlar barın mälim etti. Joba iske asqannan keyin Astana birıñğay jelige qosılıp, turğındardıñ täjirïbe almaswına jağday jasaladı, sonday-aq tehnologïyanıñ damwına mümkindikter aşıladı.
Al qatıswşılarğa qoyılatın bas­tı talap – ïnnovacïyalıq äri tehnologïyalıq önim jasaw. Joba aldımen Astanada, äri qaray elimizdiñ özge jerlerinde iske asırıladı.

Pikir jazw

Poçtañız jarïyalanbaydı