«استانا اقشامى»
ەل جۇرەگى – ەلوردا شەجىرەسى

اجالعا دەس بەرمەگەن…

0 201

«حابار» اگەنتتىگىنىڭ اتىنان ارنايى «تەلەارنانىڭ ارنايى سىيلىعى» نوميناتسياسىنا قالالىق №2 بالالار اۋرۋحاناسى يە بولدى. «ALTYN SHIPAGER» ءمۇسىنىن تابىستاعان بەلگىلى تەلەجۇرگىزۋشى، جۋرناليست مايا بەكباەۆا ءسابيدىڭ ومىرىنە اراشا تۇسەتىن اق حالاتتى جانداردىڭ جانكەشتى ەرلىگىن تولعانىسپەن ايتىپ بەردى. ال «بىرەگەي وپەراتسيا جۇرگىزگەنى ءۇشىن» نوميناتسياسىندا جەڭىپ العان قالالىق №2 بالالار اۋرۋحاناسىنىڭ نەيروحيرۋرگيا ءبولىمىنىڭ مەڭگەرۋشىسى ازامات جايىلعانوۆ بولدى.

 

بۇل وسىدان ءبىر اي بۇرىن بولعان ەدى. ءتۇس اۋا جەدەل مەديتسينالىق كومەك جەلىسى بويىنشا №2 قالالىق بالالار اۋرۋحاناسىنىڭ جاراقات پۋنكتىنە 12 جاستاعى بالا جەتكىزىلدى. تەمىر جول كوپىرىندە جوعارى كەرنەۋ­لى توكقا ءتۇسىپ، ونىڭ سالدارىنان ەسىنەن تانىپ، بەس مەتر بيىكتىكتەن جەرگە قۇلاعان.
بالانىڭ جاعدايى وتە اۋىر، باس-بەتتىڭ، مويىننىڭ، كەۋدە قۋىسى، ارقانىڭ، ءىشتىڭ، بىلەكتىڭ، سول جاق قول مەن وڭ جامباستى تۇتاس كۇيىك شالعان. اۋىر دارەجەدەگى كۇيىك زاردابىنان ەسىنەن تانىپ، قابىرعاسى مەن باس سۇيەگى جارىلعان.
جەتكىزىلگەن ساتتەن اۋرۋحانانىڭ حيرۋرگ، نەيروحيرۋرگ، تراۆماتولوگ جانە رەانيماتولوگ ماماندارى قاراپ، شۇعىل كومەك كورسەتىلەدى. جاراقاتتى تازالاپ، جەدەل تۇردە رەانيماتسيا جانە ينتەنسيۆتى تەراپيا بولىمشەسىنە جاتقىزىلادى. بارلىق زەرتحانالىق-دياگنوستيكالىق زەرتتەۋلەر جۇرگىزىلدى. سول كۇنى شۇعىل تۇردە باس ميىنا وپەراتسيا جاسالدى. دارىگەرلىك تىلمەن ايت­قاندا: الدىمەن سول جاق سامايىنداعى جارانى نەيروحيرۋرگيا­لىق وڭدەۋ، سۇيەك فراگمەنتتەرىن رەزەكتسيالاۋ، ميدىڭ سول جاق اسپالى بولىگىن تەكسەرۋ. باس ميىنىڭ قاتتى قاباتىنىڭ پلاستيكاسىن جاساۋ.
ەكى دۇنيەنىڭ ورتاسىندا جاتقان پەرىشتە بالا ميعا جاسالعان وتە كۇردەلى وتادان كەيىن كوزىن اشىپ، تىلگە كەلىپ اناسىن تانيدى. وسىدان بەس كۇن بۇرىن ناۋقاستىڭ دەنساۋلىق كورسەتكىشى جاقسارىپ جانە جاعدايى ءبىر قالىپتا تۇراقتالعاننان كەيىن اۋرۋحانانىڭ كۇيىك بولىمشەسىنە اۋىستىرىلدى. بۇگىندە جاعدايى قالىپتى، دەنەسىندەگى كۇيىكتىڭ ورنى دا جازىلىپ كەلەدى.


ەكىنشى جاعداي وسىدان ەكى اپتا بۇرىن، ميىنىڭ زاقىمدانۋىمەن 10 جاسار بالا اۋرۋحاناعا جەتكىزىلەدى. ويىن بالاسى كەسىلگەن اعاش قۇلاعان كەزدە استىندا قالىپ، اۋىر بۇتاعى بالانىڭ باسىن جارىپ كەتكەن.
تاعى دا نەيروحيرۋرگ، تراۆماتولوگ، حيرۋرگ، رەانيماتولوگ دارىگەرلەرمەن اياعىنان تىك تۇرىپ، شۇعىل تۇردە جانساقتاۋ بولىمشەسىنە جاتقىزىلىپ، ميعا وتا جاسالدى. جاي تىلمەن ايتقاندا، ميدىڭ قاۋاشاعىن اشىپتى دەيمىز عوي، بۇل جەردە بىرنەشە وپەراتسيالار جۇرگىزىلگەن: باس ميى سۇيەگىنىڭ سول جاق ماڭداي-توبە-ساماي سۇيەكتەرىنىڭ رەزەكتسيوندى دەكومپرەسسيۆتى ترەپاناتسياسى. سول جاق توبە سۇيەگىنىڭ ءپىشىندى ەپيدۋرالدى گەماتوماسىن الۋ، باس ميىنىڭ قاتتى قاباتىنىڭ پلاستيكاسى. وسىنداي كۇردەلى وتا بالانىڭ جانىن ساقتاپ قالادى، ەكى-ءۇش كۇندە جاعدايى تۇراقتالعاننان كەيىن نەيروحيرۋرگيا بولىمشەسىنە اۋدارىلدى. بالا ەسىن جيىپ، قايتا سويلەي باستادى.
اۋىر سىناق تۇرالاتىپ تاستاپ، جانىن شۇبەرەككە تۇيگەن بالالاردىڭ اتا-انالارىنىڭ ءحالى ايتپاسا دا تۇسىنىكتى. №2 بالالار اۋرۋحاناسىنىڭ بارشا قىزمەتكەرلەرى ءبىر كىسىدەي جۇمىلىپ، ءسابيدىڭ جانىن اراشالاۋعا كىرىسكەن ساتتەرىن ەلەستەتكەندە جاي وقىرمان مەنىڭ ءوزىم تولقىپ كەتەمىن. اق حالاتتى جانداردىڭ ارتىقشىلىعى دا وسىندا جاتسا كەرەك. باسقانىڭ ءبارى كۇدەرىن ۇزگەندە بالانىڭ جۇرەگىن قايتا سوققىزىپ، باس سۇيەگىن جاماپ، ميىن قالپىنا كەلتىرۋگە تاۋەكەل ەتۋ ۇلكەن قايسارلىقتىڭ بەلگىسى بولسا كەرەك. ال قازىرگى كۇننىڭ قاھارماندارى كىم دەگەندە ويىما وسى جانداردىڭ ەسىمى ورالادى.
ول – ازامات جايىلعانوۆ، نەيروحيرۋرگيا ءبولىمىنىڭ مەڭگەرۋشىسى، ساكەن ءجۇنىسوۆ – ينتەنسيۆتى تەراپيا جانە رەانيماتسيا ءبولىمىنىڭ مەڭگەرۋشىسى، باقىتحان ساعيدوللا – كۇيىك ءبولىمىنىڭ مەڭگەرۋشىسى. وسى ۇجىمنىڭ باس دارىگەرى – ءبىرجان دوسمايلوۆ. مەرەيلەرىڭ ۇستەم بولا بەرگەي، قادىرلى دارىگەرلەر!

پىكىر جازۋ

پوچتاڭىز جاريالانبايدى