«استانا اقشامى»
ەل جۇرەگى – ەلوردا شەجىرەسى

اقشا كىمگە بىتەدى؟

0 270

باي بولسام دەپ ارماندامايتىن ادام جوق شىعار. الايدا قانشاما ادامنىڭ جۇرەك قالاۋى مەن شىنايى تۇرمىسىنىڭ اراسىنداعى ايىرماشىلىق جەر مەن كوكتەي. نەگە؟ بۇل ساۋال­دىڭ جاۋابىن اركىم وزىنشە ىزدەيدى: بىرەۋگە ءبىلىم جەتپەيدى، بىرەۋدە تاجىريبە جوق، ەندى ءبىرى جەكە كاسىبىن باستاۋ ءۇشىن قاجەتتى نەسيە الا الماي ءجۇر.

دەگەنمەن قولىنا اقشا اينالا باستاسا، ونى ودان ءارى كوبەيتىپ، قورلانۋدى ەمەس، تەزىرەك جۇمساۋعا تىرىسادى. ماسەلەن، توي جاساۋ، جاڭا كولىك ءمىنۋ، شەتەلگە ساياحاتتاۋ، مول ءىشىپ-جەم مەن ءساندى كيىمدەر ساتىپ الۋ، ويتكەنى اقشا تاپشىلىعىن كورگەن ادامنىڭ نەگىزگى ارماندارى – وسىلار. ءومىردىڭ ماتەريالدىق يگىلىگىن كورۋگە دەگەن قالاۋىڭىز­عا ەشكىم دە قارسى ەمەس، ارينە. بىراق ءبىز ايتقىمىز كەلىپ وتىرعان پارادوكس وسى جەردە تۇر. اقشاسىنىڭ مول بولعانىن ارماندايتىن ادامداردىڭ بايلىققا، داۋلەتتى بولۋعا دەگەن كوزقاراسى بىردەي ەمەس. «اقشا ادامدى بۇزادى»، «ماعان بايلىق جاقپايدى»، «اقشا جۇرگەن جەردە ادامي قارىم-قاتىناسقا ورىن جوق» دەگەن تۇجىرىمدار سانامىزدان مىقتاپ ورىن العان، وسىنداي ستەرەوتيپتەردەن ارىلا الماي ءجۇرمىز.
ءبىز ءوز ءومىرىمىزدى قالاي باقىلاي الاتىنىمىزدى تۇسىنبەيىنشە، تىرشىلىكتەگى ءتۇرلى جاعدايلاردىڭ قۇربانى بولىپ قالا بەرەمىز. ءبارى دە ءوز تاعدىرىمىز­دى ءوز قولىمىزعا الۋعا دەگەن باتىلدىقتان باستالادى. ءسىزدىڭ بۇگىنگى تۇرمىس دەڭگەيىڭىز – ويلاۋ جۇيەڭىزدىڭ جەمىسى. قازىرگى ويىڭىز وزگەرمەسە، بەس جىلدان كەيىنگى نەمەسە ون جىلدان كەيىنگى ءومىرىڭىز دە وسىنداي بولاتىنى كۇمانسىز دەسەم بولادى. بالكىم، ءسىز ويلايتىن شىعارسىز، «بۇل مەنىڭ تاعدىرىم عوي، بۇعان قارسى نە شارا جاساي الامىن» دەپ. ارينە، سولاي. باسىڭىزعا تۇسكەن ىسكە ءسىز نە ىستەي الاسىز؟ بىراق بۇل جەردە ومىرىڭىزدەگى قيىندىقتان گورى سول جاعدايعا ءسىزدىڭ قانداي رەاك­تسيا بىلدىرەتىنىڭىز ماڭىزدى. ومىرىندەگى قارجىلىق قيىندىققا وزىنەن باسقانىڭ ءبارىن كىنالايتىندار بار. ۇكىمەتتى، دوستارىن، تۋعان-تۋىسقاندارىن، ارىپتەستەرىن، ينفلياتسيانى ت.ب. تەك قانداي دا ءبىر قولعا العان ءىسى جۇرمەي جاتسا، ونىڭ سەبەبىن وزىنەن ىزدەۋدى ويلامايدى. وسىعان بايلانىستى مەنىڭ ايتار كەڭەسىم مىناداي: ءومىر سىناقسىز بولمايدى، ولاردى قۇدايدىڭ ماڭدايىما جازعانى دەپ ءتۇسىنىپ، ودان شىعار جول ىزدەۋ كەرەك. ءاربىر اۋىرتپالىقتان سوڭ جەڭىلدىك، ءاربىر سىناقتان كەيىن سىي تۇرعانىن ۇمىتپاڭىز. تەك سول قيىندىق­تارعا دەگەن ءبىزدىڭ كوزقاراسىمىز (رەاكتسيا­مىز) دۇرىس بولۋى كەرەك. ياعني، ءبىز قاشاندا جاقسى ويلاۋعا، ۇنەمى ءپوزيتيۆتى بولۋعا داعدىلانۋىمىز قاجەت. كەدەرگىلەردەن قاشىپ قۇتىلۋدىڭ ەمەس، ولاردى شەشىپ قۇتىلۋدىڭ امالىن جاساعان ادام عانا تابىسقا جەتەدى.

التىن مامەتەك

پىكىر جازۋ

پوچتاڭىز جاريالانبايدى