«Astana aqşamı»
El jüregi – elorda şejiresi

Äkim mindetter jüktedi

0 31

Nur-Sultan qalasınıñ äkimi bolıp tağayındalğan Altay Kölginov öz qızmetin elordanıñ tınıs-tirşiligin qamtamasız etetin birqatar mañız­dı nısandardı aralawdan bastadı.

Aldımen elordadağı jedel medïcïnalıq järdem stancïyasınıñ jumısımen tanısıp, qız­metkerlerdi käsibï merekesimen quttıqtağan Altay Kölginov medïcïna qızmetkerlerimen kezdesw ötkizdi.
Qazirgi tañda qalada 20000-nan astam däriger jumıs istese, onıñ 1000-nan astamı jedel järdem qızmetinde eñbek etedi. Mundağı därigerler jılına 800 mıñ, künine 2000-nan asa adamğa qızmet körsetip otır. Stancïya barlıq qajetti jabdıqtarmen qamtamasız etilgen. Jaqında tağı qosımşa 52 jedel järdem köligi paydalanwğa beriledi.
Büginde Nur-Sultan qalası boyınşa kün sayın 110 brïgada jumıs isteydi. Onıñ işinde Qalalıq jedel medïcïnalıq järdem stancïyası 82, emhanalarda 28 brïgada jedel medïcïnalıq kömek körsetedi.
Äkim «Astana-AEK» akcïonerlik qoğamınıñ energïyamen qamtamasız etw nısandarınıñ jılıtw mawsımındağı dayındıq jumıstarına da tekserw jürgizdi. Qazirgi waqıtta jöndew jumıstarı jürip jatqan 2-şi jılw elektr ortalığınıñ jumısı jäne 3-şi jılw elektr ortalığınıñ jağdayın da talqıladı.
Bïıl qalada №6 jaña twrbïna men №8 bw jiberetin mañız­dı qazandıq qayta jöndelwde. Jospar boyınşa aldağı jılıtw mawsımına deyin ayaqtalwı tïis. Qazirgi waqıtta jöndew jumıs­tarı belgilengen kestege säykes jürgizilip jatqanın bilgen äkim jöndew jumıstarınıñ merziminde ayaqtawdıñ mañızdılığın atap ötti. «Qala kün sayın ösip keledi, osığan ilese elektr, jılw, swmen qamtamasız etw jäne basqa da mañızdı ïnfraqurılımğa degen qajettiligi de artwda. Sondıqtan, qalanıñ ïnfraqurılımdarına köñil bölw, mawsımdıq dayındıq jumıstarın wağında istew jäne onı damıtw bastı mindetimizdiñ biri sanaladı» dedi Altay Kölginov.
Sonımen qatar, «Astana-AEK» AQ energïyamen qamtamasız etw nısandarınıñ jumısımen jäne käriz jelileriniñ swın tazartw stancïyası jumısımen tanısqan Altay Kölginov energïya ünemdew mäseleleri, sonday-aq transformatorlıq jäne taratw stancïyaların kürdeli jöndewden ötkizw, elektr jelilerin bögde uyımdardıñ balansınan «Astana-AEK» AQ balansına berw jönindegi jol kartası talqılandı. Aldağı waqıtta KOS-2 stancïyasın qurw mäselesiniñ özektiligi jöninde basa aytqan äkim önimdilikti arttırw, qızmet ötew sapasın joğarlatw jöninde tapsırmalar berdi.
Äkim Nur-Sultan halıqaralıq äwejay awmağına jaqın mañdağı, dälirek aytqanda, Qabanbay batır dañğılı boyında jürip jatqan jol qurılısın da tekserip qayttı. Waqıtşa jabılğan jol böliginen keyde kölik keptelisi bolatının bayqağan äkim joldıñ sapasına kepildik ete otırıp, jumıstı erterek tïyanaqtaw jöninde talap qoydı. Jol jöndeytin qızmetkerler köşeni şilde ayınıñ basında tolıq aşıp, jürwge mümkindik beremiz dep äkimge wäde berdi.
Sonımen qatar 34 şaqırımdı quraytın «Oñtüstik-batıs aynalma jolı» magïstrali qurılısınıñ aralıq nätïjelerimen de tanısıp, jumıstıñ belgilengen keste boyınşa jürip jatqanına oñ bağasın berdi.
Jaqında qala aktïvimen ötken jïında Memleket basşısı Qasım-Jomart Toqaev qalanıñ ïnjenerlik ïnfraqurılımına köñil bölw men turğındardıñ ömir sürw sapasın arttırw kerektigin tapsırğan bolatın. Osı rette Altay Kölginov qala mañında ornalasqan birneşe turğın üy keşenderi men jol ïnfraqurılımdarın aralap şıqtı. Köktal-1, Köktal-2, sol mañdağı köpir men Sarıarqa awdanındağı tozığı jetken üylerdi sürw jumıs­tarımen tanıstı.
Qazir Köktal turğın üy alabında 41 köşe salınwda. Bul jergilikti ïnfraqurılımdı edäwir jaqsartadı. Biraq qazirgi waqıttağı qolaylı awa rayına qaramastan, keybir wçaskelerde jol jöndewşilerdiñ joq ekenin bayqağan äkim elordada qurılıs maw­sımınıñ qısqa ekenin eskertip, qurılısşılarğa köşelerdi retke keltirwdi waqıtı­lı ayaqtawın qadağalap tapsır­dı.
Sarıarqa awdanınıñ turğındarı jol sapasına, jarıqtandırwğa, trotwarlar men kögaldandırw isine jïi şağımdanatın mäselelerdi de nazardan qağıs qaldırmağan äkim Köktaldağı sayabaqtıñ qurılısı sozılıp ketwiniñ sebebin de bildi. Sonımen qatar, jolawşılardıñ jürip-turwına ıñğaylı jağday jasaw üşin «Bükir köpir» (gorbatıy most) awmağında qosımşa jol salw qajettigin aytqan äkim tïisti mekemelerge mañızdı mindetter jüktedi.

Pikir jazw

Poçtañız jarïyalanbaydı