«استانا اقشامى»
ەل جۇرەگى – ەلوردا شەجىرەسى

ەلدى ەلەڭ ەتكىزگەن

0 104

الىپ اۋەجاي اشىلدى

تۇركيانىڭ ىستانبۇل قالاسىندا Yeni havalimanı دەپ اتالاتىن جاڭا اۋەجاي اشىلدى. Anadolu اگەنتتىگىنىڭ حابارلاۋىنشا، ونىڭ جالپى اۋماعى 76,5 ملن شارشى مەتردى قۇرايدى.

«ءۇشىنشى» دەپ تە اتاۋ العان اۋەجايدىڭ اشىلۋ سالتاناتىنا تۇركيا پرەزيدەنتى رەجەپ تايپ ەردوعان قاتىستى. ونىڭ ايتۋىنشا، جاڭا عيمارات جىلىنا 90 ملن جولاۋشىعا قىزمەت كورسەتە الادى. ال جوبا تولىعىمەن اياقتالعاننان كەيىن 150 ملن.، قاجەت بولعان جاعدايدا 200 ملن ادامدى قابىلداۋعا قاۋقارلى بولماق.
ونىڭ قۇرىلىسىنا 10,247 ملرد ەۋرو قارجى جانە 42 اي ۋاقىت جۇمسالىپتى. قازىر كەشەن اۋماعىندا 6 ۇشۋ-قونۋ جولاعى، 500 ۇشاق تۇراعى، سونداي-اق 70 مىڭ كولىك قابىلداي الاتىن اشىق جانە جابىق اۆتوتۇراق بار.
ىستانبۇلدا وسىمەن ءۇشىنشى اۋەجاي اشىلىپ وتىر.

مەركەل ساياسي ارەنادان كەتە مە؟

گەرمانيا كانتسلەرى انگەلا مەركەل 2000 جىلدان بەرى باسشىلىق ەتىپ كەلە جاتقان حريستيان-دەموكراتيالىق وداعى پارتياسىنىڭ كەزەكتى سايلاۋىنا تۇسپەيتىنىن ءمالىم ەتتى.

BBC باسىلىمىنىڭ حابارلاۋىنشا، پارتيا­نىڭ گەسسەن جانە باۆاريا جەرىندە بولعان سايلاۋداعى جەڭىلىسىنەن كەيىن كانتسلەر وسىنداي شەشىمگە كەلگەن. وتكەن سايلاۋمەن سالىستىرعاندا 11,3 پايىزعا از داۋىس جيناپتى. سونداي-اق
قىركۇيەك ايىنداعى ساۋالناما ناتيجەسىندە سايلاۋشىلاردىڭ باسىم بولىگى مەركەلدىڭ جۇمىسىنا كوڭىلى تولمايتىنى انىقتالدى. تەك 17 پايىزى عانا ريزاشىلىعىن ءبىلدىرىپتى.
بۇعان قوسا ول 2021 جىلدان كەيىن كەز كەلگەن ساياسي لاۋازىمعا ۇمىتكەر بولمايتىنىن جەتكىزدى. ياعني ءدال وسى جىلى گەرمانيا كانتسلەرى قىزمەتى اياقتالعاننان كەيىن ساياسي ارەنادان كەتپەك.

يتاليا سۋ استىندا

يتاليادا تولاسسىز جاۋىن مەن قاتتى داۋىلدان مەملەكەتكە ۇلكەن شىعىن كەلدى. تابيعاتتىڭ توسىن مىنەزىنەن بىرنەشە ءوڭىردى سۋ الدى.

جەرگىلىكتى ANSA اگەنت­تىگى ۆەنەتسيادا سۋ دەڭگەيى 156 سم-گە دەيىن كوتەرىلىپ، ناتيجەسىندە قالانىڭ 75 پايىزى سۋ استىندا قالعانىن حابارلادى. ال لاتسيودا كۇشتى جەلدىڭ سالدارىنان اعاشتار تامىرىمەن قۇلاپ، 160 مىڭ تۇرعىن ەلەكتر جەلىسىنەن قاعىلعان. بەلگىلى بولعانداي، داۋىلدىڭ جىلدامدىعى ساعاتىنا 130 شاقىرىمدى قۇراپتى.
يتاليادا جەكسەنبى كۇنى اۋا رايى كۇرت بۇزىلىپ، ءتۇرلى اپاتتان 12 ادام قازا بولدى. وسىنىڭ سالدارىنان ەل بيلىگى بىرنەشە وبلىستا توتەنشە جاعداي جاريا­لادى.

پىكىر جازۋ

پوچتاڭىز جاريالانبايدى