«استانا اقشامى»
ەل جۇرەگى – ەلوردا شەجىرەسى

2018 جىل: ارىپتەستەرىم اسكەري باسپاناعا يە بولدى

0 69

ەلىمىزدە ۇلتتىق قاۋىپسىزدىك جۇيەسى نىقتالىپ، كۇش قۇرىلىمدارىنىڭ ماتەريالدىق-تەحنيكالىق بازاسى نىعايىپ، اسكەري قىزمەتشىلەردىڭ الەۋمەتتىك ماسەلەلەرى شەشىمىن تاۋىپ كەلەدى. سونىڭ ءبىرى «اسكەري باسپانا» مەملەكەتتىك باعدارلاماسى دەر ەدىم.

قازاقستان رەسپۋبليكاسى ۇلتتىق ۇلانىنىڭ مەن قىزمەت ەتىپ وتىرعان ءبىر عانا ءبولىنىسى – استانالىق جەدەل قۇرامانىڭ وزىنەن اتالمىش باعدارلاما اياسىندا 58 اسكەري قىزمەتشى بايقاۋدان ءوتتى.  سوڭعى ءۇش-ءتورت ايدىڭ ىشىندە ەڭبەك ءوتىلى مەن وتباسى مۇشەلەرىنىڭ سانى بويىنشا باسپانالى بولۋ مۇمكىندىگىنە يە بولعان قىرىققا جۋىق وتباسى جاڭا پاتەرگە قول جەتكىزدى. سولاردىڭ قاتارىندا ءوزىم دە بارمىن. باعاسى باسقا وڭىرلەردەن ەرەكشەلەنەتىن باس قالامىزدا باسپاناعا قول جەتكىزۋدىڭ – ۇلكەن قۋانىش ەكەنىن بىلەسىزدەر. جىلدار بويى جالدامالى پاتەردە تۇرعاندىقتان با، شىنىن ايتسام، ءۇيلى بولۋ ءۇشىن دوڭگەلەگەن بيزنەسىڭ، يا بولماسا تۇراقتى ءبىر كىرىس كوزى بولۋ كەرەك دەپ ويلايتىنمىن. ءۇش بولمەلى پاتەردىڭ يەسى اتانۋىمىز – ەلباسىنىڭ اسكەريلەرگە كورسەتكەن مەملەكەتتىك قولداۋى مەن ەل قالقانىنا اينالعان ۇلتتىق ۇلان ساپىنداعى ون ءۇش جىلدىق قىزمەتىمنىڭ جەمىسى دەپ بىلەمىن.

ەلوردا ىرگەسىندە ورنالاسقان جەدەل قۇراما – 5573 اسكەري ءبولىمى ەلوردا تىنىشتىعىنىڭ كۇزەتىن كۇشەيتۋ ماقساتىندا قۇرىلعان بولاتىن. 2014 جىلدىڭ 14-قاراشاسىندا نۇرسۇلتان نازارباەۆتىڭ قاتىسۋىمەن سالتاناتتى تۇردە اشىلۋ سالتاناتى ءوتىپ، جاۋىنگەرلىك تۋ تابىستالعان ەدى. سودان بەرى ارۋ استانامىز پەن قالا حالقىنىڭ قاۋىپسىزدىگىن كۇزەتىپ، حالىقارالىق، رەسپۋبليكالىق ماڭىزى بار باسقوسۋلار، سپورتتىق-مادەني ءىس-شارالار، رەسمي كەزدەسۋلەر كەزىندە تىنىشتىقتىڭ كەپىلى بولىپ كەلەدى. كۇن سايىن قىزمەتكە رەسپۋبليكامىزدىڭ بارلىق ايماعى بويىنشا ۇلتتىق ۇلاننان 5000-داي سارباز بولىنسە، قالامىزدىڭ ءتورت اۋدانىندا ىشكى ىستەر ورگاندارىمەن بىرگە كوشە ءتارتىبىن قاداعالاۋعا 5573 اسكەري بولىمىنەن جۇمىلدىرىلاتىن اسكەري جاساقتار قاتارىنداعى جاۋىنگەرلەر سانى مىڭعا جۋىقتايدى.

وسىنداي الىپ قۇراماداعى وفيتسەرلىك قۇرام بولسىن، كەلىسىم-شارت نەگىزىندە قىزمەت اتقاراتىن اسكەري قىزمەتشىلەر بولسىن، قالا تىنىشتىعىنا ءاربىر ماماننىڭ قوسار ۇلەسى زور. تىرشىلىگى تاۋلىكتىڭ جيىرما ءتورت ساعاتىندا توقتامايتىن، باتالوندارى مەن جەكە قۇرامى ءبىرىن-ءبىرى الماستىرىپ وتىراتىن، ەل مەرەكەلەپ جاتقاندا، كەرىسىنشە كۇشەيتىلگەن رەجيمدەگى قىزمەتكە كوشەتىن ەلوردالىق ۇلاندىقتار ءۇشىن 2018 جىل جوعارىدا ايتىلعان جاقسى جاڭالىعىمەن، الەۋمەتتىك تۇرعىداعى ەڭ ۇلكەن ماسەلە – باسپانا ماسەلەسىنىڭ شەشىلۋىمەن بەرەكەلى جىل بولدى دەۋگە تولىق نەگىز بار. مەملەكەت تاراپىنان قولداۋ تاۋىپ وتىرعان وتان قورعاۋشىلار دا مۇنداي قامقورلىققا ءوز كەزەگىندە كاسىبي شەبەرلىگىمەن جانە ادال قىزمەتىمەن جاۋاپ قايتارارى ءسوزسىز.

ءمولدىر نالىباەۆا،
ۇلتتىق ۇلان وفيتسەرى

پىكىر جازۋ

پوچتاڭىز جاريالانبايدى